Կարինե Ղուկասյանի գործարար ուղին սկսվել է 1999–2000 թվականներին, երբ նա հիմնադրեց «Կառա և Կարեն» ՍՊԸ-ն։ Այդ տարիներին Հայաստանում կանանց կողմից ստեղծված և ղեկավարվող բիզնեսները քիչ էին, իսկ տեղեկատվական ու խորհրդատվական աջակցությունը՝ սահմանափակ։ Իրավական դաշտում հստակության պակասը, ֆինանսական ռիսկերն ու շուկայի անորոշությունը պահանջում էին բացառիկ կամք և հաստատակամություն։ Կարինեն մանրամասն ուսումնասիրեց Լոռու մարզի շուկան և արձանագրեց կաթնաթթվային մթերքի տեղական արտադրության բացը։ Այս վերլուծության հիման վրա նա մեկնարկեց «Նարինե» արտադրանքի թողարկումը՝ վստահ լինելով, որ որակն ու հետևողականությունը կձևավորեն պահանջարկը։
Առաջին տարիները բարդ էին․ ներդրված աշխատանքը հաճախ չէր բերում ակնկալվող արդյունք, իսկ ֆինանսական և իրավական խնդիրների լուծումը պահանջում էր նոր գիտելիքներ ու հմտություններ։ Սակայն ժամանակի ընթացքում ձեռք բերած փորձը և շուկայի ավելի խոր ըմբռնումը բիզնեսը դարձրեցին կայուն։ Հետագայում Կարինե Ղուկասյանը ընդլայնեց գործունեությունը՝ հիմնելով նաև կարագի արտադրություն և ամրապնդելով ընկերության դիրքը տեղական շուկայում։ Միաժամանակ նա ակտիվորեն ներգրավված է հասարակական կյանքում՝ եղել է Վանաձոր համայնքի ավագանու անդամ և շարունակում է ակտիվ գործունեություն ծավալել քաղաքացիական հասարակության ոլորտում՝ համադրելով ձեռնարկատիրական փորձն ու հանրային պատասխանատվությունը։
Նմանատիպ ռեսուրսներ
