Օքսեջեն Հիմնադրամ

«ՕքսԵՋեն» հիմնադրամը քաղաքացիական հասարակության առաջատար կազմակերպություն է, որը Հայաստանում գործում է տվյալահեն քաղաքականության, հանրային երկխոսության և կարողությունների զարգացման ուղղություններով՝ հատուկ շեշտադրելով կանանց հզորացումը և նրանց մասնակցության ընդլայնումը հասարակական, սոցիալ-տնտեսական և քաղաքական գործընթացներում։ Հիմնադրամի գործունեությունը միտված է հանրային որոշումների որակի բարձրացմանը, ժողովրդավարական կառավարման ամրապնդմանը և կայուն զարգացման խթանմանը։

«ՕքսԵՋեն»-ի կողմից իրականացվող «Կանանց հզորացում՝ հանուն Հայաստանի ժողովրդագրական դիմակայունության» նախաձեռնությունը նպատակ ունի աջակցել Հայաստանի ժողովրդագրական մարտահրավերների հաղթահարմանը՝ կանանց կարողությունների և ընտրության հնարավորությունների ընդլայնման միջոցով։ Նախաձեռնությունը խթանում է փաստերի և տվյալների վրա հիմնված քաղաքականությունների մշակումը, նպաստում է բովանդակային հանրային քննարկումների կազմակերպմանը, ինչպես նաև քաղաքացիական հասարակության և մեդիայի կարողությունների զարգացմանը։ Այս շրջանակում «ՕքսԵՋեն»-ը իրականացնում է կանանց համար ուղղված ուսուցումներ, մենթորական ծրագրեր և ցանցային միջոցառումներ՝ բարձրացնելով հատկապես 30–40 տարեկան կանանց զբաղվածության և կարիերայի զարգացման հնարավորությունները՝ ներառյալ մայրության արձակուրդից վերադարձող, հաշմանդամություն ունեցող և երեխա խնամող կանանց։

Միաժամանակ հիմնադրամը իրականացնում է «Ուժը գործողության մեջ․ կանանց մասնակցության խթանում խաղաղության և անվտանգության գործընթացներում Հայաստանում» ծրագիրը, որը միտված է ամրապնդել Հայաստանի հանձնառությունը «Կանայք, խաղաղություն և անվտանգություն» օրակարգին։ Ծրագիրը նպաստում է պետական կառույցների ինստիտուցիոնալ կարողությունների զարգացմանը, կանանց քաղաքացիական հասարակության ցանցերի հզորացմանը և տեղացի ու տեղահանված կանանց մասնակցության ընդլայնմանը խաղաղության և անվտանգության քաղաքականությունների մշակման ու վերահսկման գործընթացներում՝ հատկապես Սյունիքի, Տավուշի և Վայոց ձորի մարզերում։

«ՕքսԵՋեն» հիմնադրամի գործունեությունը առանձնանում է համակարգված, տվյալահեն և ներառական մոտեցմամբ, որտեղ կանայք դիտարկվում են ոչ թե որպես շահառու, այլ որպես փոփոխությունների կրող և քաղաքական օրակարգի ակտիվ դերակատար։ Հիմնադրամի ծրագրերը նպաստում են կանանց առաջնորդության, ազդեցության և հանրային ձայնի ամրապնդմանը՝ երկարաժամկետ ներդրում ապահովելով Հայաստանի կայուն զարգացման և ժողովրդավարական դիմակայունության մեջ։

Առավել մանրամասն կարող եք տեսնել այստեղ։